阿仙奴歐聯吐烏氣

猪拉多纳

16/08/2011
文： 樂比堅尼

歐聯外圍賽附加賽首回合於香港時間周三凌晨開打，重頭戲上演「英意法俄」聯軍大廝殺，英超阿仙奴主場對意甲烏甸尼斯，及法甲里昂主場對俄超魯賓卡山。阿仙奴歐聯主場一向好惡，近兩季十戰共得九勝一和，當中遇弱必贏兩球或以上，今晚對住意甲未開咧兼星散嘅烏甸，捧主W及大盤！（有線61及201台周三凌晨2時45分直播）




法比加斯轉投巴塞、拿斯尼離隊在即，好多人擔心「兵工廠」王朝面臨瓦解，但熟悉阿仙奴嘅朋友應該知道，阿仙奴呢幾年培育咗大批新血，真係冇話冇咗邊個唔得，所以阿仙奴嘅危機只係被傳媒放大，實際影響未必咁深遠，艾朗藍斯、謝雲奴等人今季有能力上位。


歐聯主場惡 烏甸星散


事實上，阿仙奴歐聯經驗相當豐富，主場更係惡過惡爺，強如地上最強嘅巴塞隆拿，近兩次作客阿仙奴都僅得一和一負。阿仙奴除累積歐聯十仗主場不敗，佢哋對上一次喺歐聯主場輸畀非英格蘭球隊已經係○三年九月。




意甲近年水準不斷下滑，即使係兩大班霸AC米蘭及國際米蘭，上屆歐聯都係十六強及八強止步，何況係聯賽「梗頸四」嘅烏甸尼斯，更加難與阿仙奴相提並論，畢竟佢哋首席球星阿歷斯山齊士已轉投巴塞，加上中後場大將恩拿及沙柏達華倫西亞離隊，實力同上季相比差一截。阿仙奴英超開咧戰贏唔到一肚氣，正好搵烏甸發洩，嫌主W冇肉食可捧埋大盤！




歐聯附加賽採主客兩回合制，今輪為首回合，共廿支球隊參加，十支勝方可進身分組賽，十支負方則獲得歐霸盃分組賽資格。