侯城「強客」獵殺列斯聯

猪拉多纳

16/08/2011
文： 麥馬拿仁

英冠開咧冇耐，快車賽程已殺到，今晚七場之中拿仁首推侯城。列斯聯主場鬥侯城，主隊聯賽兩連敗表現曳，上仗仲有隊長侯臣同主力麥斯格拉度被逐今場停賽，實力削弱難反彈。「老虎」侯城一向客強主弱，上季聯賽曾試過連續十七場作客未輸過，受讓當然要捧場！（周三凌晨2時45分開賽）


列斯聯頭頭碰着黑


列斯聯季前熱身賽曾三比二擊敗紐卡素，當時領隊格雷臣也文也武，話班波弗到震，點知開咧完全走樣，仲頭頭碰着黑。首仗不敵修咸頓後格帥已大發雷霆，上仗又畀球證連趕兩個主力出場，最後冇埋三分。今場列斯聯陣容不整，靈魂射手比治奧又仲未傷愈復出，難怪格帥都話要盡快買新前鋒。列斯聯一開季就打窒條氣，咁快仲要撞正快車賽期，要翻身未係時候。




隊徽有個老虎頭嘅侯城係支奇怪球隊，主場曳到震，作客有如猛虎出柙，往往順風順水，上季齋計作客成績，侯城高踞第四；所取分數比主場所得多出七分，真係估佢唔到。本季侯城繼續此條攤路，首戰主場不敵黑池，上仗去到勁旅葉士域治地頭，就爆冷贏一比○。侯城咁有性格，今場續有「客場之利」鬥列斯聯，受讓捧「讓球客勝」。


韋斯咸作客好「細」界


另一場屈福特主場對韋斯咸，「錘仔幫」上仗作客唐卡士打，開波五分鐘路蘭已打開紀錄，最後贏一比○完場，反映領隊艾拿戴斯於客戰場合，戰術比較保守，而韋斯咸人腳雖強，攻力亦唔算犀利，今場捧細。葉士域治主場對修咸頓，主隊新敗再於自己地頭出戰，祖柏等必搏命入波，信雙方攻力，捧大。