里昂熱W開「山」劈石

猪拉多纳

16/08/2011
文： 力奇

兩支歐聯常客狹路相逢爭1個分組賽席位，力奇就睇好經驗較為豐富嘅里昂，喺今晚首回合對壘可以喺主場先下一城擊敗魯賓卡山，特別係後者啱啱喺聯賽打完場硬仗，今仗疲兵再戰凶多吉少，我捧1.52倍主勝。（有線62及202周三凌晨2:45直播）


魯賓卡山踢完硬仗殘晒


力爭連續第12次殺入歐聯分組賽嘅里昂，今夏人腳變動唔算太大，雖則中場放走咗杜拿蘭，好在都留住其餘主力包括中場米高巴斯圖斯、射手利辛度盧比斯，整體實力得以保持。睇番佢哋開季聯賽2戰得1勝1和唔算曳，最重要係佢哋近18場歐洲賽主場戰只係輸過兩場，主場威力強勁，贏波機會當然樂觀。




客隊魯賓卡山上圈淘汰基輔戴拿模晉級當然抵讚，但要留意係佢哋當時作客贏2:0之戰，原來係近7場歐洲賽作客首次贏波，呢班波失地利其實唔多信得過。




雖然早幾日新簽入巴拉圭前鋒希度華迪斯，不過未趕及註冊今仗唔使預佢。上周末呢支俄超「老四」硬撼「一哥」莫斯科中央陸軍踢和1:1，比賽最後30分鐘仲要打少個，都咪話唔辛苦，依家仲要舟車勞頓去到法國比賽，睇怕好難全身而退咯。