墨西哥抖夠追擊森巴疲兵

猪拉多纳

17/08/2011
文： 牛奶仔

世青盃聽朝會上演兩場4強大戰，尾場會由爭標大熱門巴西U20硬撼墨西哥U20，「森巴小子」周一朝早同西班牙激戰120分鐘後，事隔3日又再度出擊，反觀墨西哥休息時間較長，更有後防主力復出，要喺90分鐘保持不敗絕對唔難，要2倍「讓球客勝」。（開賽時間：周四早上9:00）




巴西上場對西班牙，加時都未能分出高下，結果要戰至互射12碼先淘汰對手晉級，球員體力消耗極大，事隔3日再上征途，相信一班森巴小將仲未回得切氣。


巴西防線主力繼續缺陣


事實上，巴西今屆賽事表現未算好有霸氣，今屆5場比賽只得3場能夠喺法定時間內解決對手。雖然効力國際米蘭嘅中場菲臘比古天奴今屆表現穩定，暫時有3球進帳，可惜山度士守將阿歷士辛度多數會繼續養傷，防線唔多完整。




另一邊廂，墨西哥上場以3:1輕取主辦國哥倫比亞，後備殺手艾迪臣利維拉於上半場入替後即梅開二度，相信今場有機會擔正攻堅。除咗比巴西踢少30分鐘外，墨西哥仲比對方多一日休息時間，成班波抖足晒出戰，上場停賽嘅中堅基斯頓艾華利斯又可以復出，繼1977年第1屆世青盃後再殺入決賽真係唔奇。


世青盃賽制


今場為4強賽，賽事以一場過分勝負，若法定時間內打成平手，則需加時作賽，再和則互射12碼決勝。