皇馬同花順晒巴塞冷

猪拉多纳

18/08/2011


兩雄激鬥，唔係你死就係我亡！新季西甲呢個周末開唔開到未知，但係《太陽波經》今明兩日都會同大家分析形勢！係呀，睇個勢新季都係由皇馬同巴塞爭霸，不過戰況就肯定更激烈！事關近年畀巴塞恰死嘅「銀河艦隊」，季前增兵唔重花巧重實際，揸住條細細哋嘅同花順，向完成最後中場拼圖嘅「地上最強」宣戰！


莫帥統天下唔再玩浮誇 銀河艦隊力足爭霸


「你……叫我做浮誇吧！」皇馬歷來增兵，名氣重於一切，特別係皮里茲會長年代，由以前嘅施丹、碧咸，到舊年嘅奧斯爾同迪馬利亞等，超豪華陣容永遠先聲奪人。不過，面對被譽為史上最強嘅巴塞隆拿，「銀河艦隊」終於放棄浮誇，今夏正式將轉會大權交畀「寸王」莫連奴，結果買入5星全部實際多於姿勢，要打倒「地上最強」王朝？唔係靠把口嘅！




大權在握創皇馬先河




「寸王」上季初接手皇馬，即刻為「銀河艦隊」帶嚟西班牙盃，但正所謂羅馬非一天建成，要挑戰巴塞始終未係時候。特別係莫帥要長期分心同體育總監華丹奴爭權，又點會打造到完美大軍呢？




好彩，今夏皇馬正式宣布同華丹奴「分手」，破天荒將所有大權交晒畀莫帥，等「寸王」買人可以跟足自己心水，法比奧干查奧、紐尼沙軒同荷西卡利祖等，全部名氣都唔算太大，但佢哋跟足莫帥戰術走埋一齊，就等於幾隻細牌變同花順咁有威力！




跟足心水買實際5星

咁又係，查實「寸王」一向奉行兩翼側擊加硬淨中場，紐尼沙軒、咸美艾天托普同華拉尼都相當大隻、攻守兼備，荷西卡利祖同法比奧干查奧則係側擊能手，加埋原有射手賓施馬終於學乖，今季有望修成正果，只要C朗Keep得到上季勇態，「銀河艦隊」絕對同巴塞有得砌！

皇馬in & out

▼ In

紐尼沙軒 多蒙特1,000萬歐元

咸美艾天托普 拜仁慕尼黑自由身

荷西卡利祖 愛斯賓奴500萬歐元

華拉尼 朗斯1,000萬歐元

法比奧干查奧 賓菲加3,000萬歐元

▼ Out

艾迪巴約 曼城借用完畢

杜迪克 —退休

加雷 賓菲加500萬歐元

簡拿利斯 華倫西亞外借