洪禮賢講馬：晨課動態咪睇小

猪拉多纳

　　賽事以馬匹為本，數據係重要，但正如之前講過，其實仲有好多周邊嘅嘢要考慮，唔係單一想法便足夠，純粹咁諗冇話錯晒，但係咪可以長遠咁運作，唔多覺得會work。

　　以晨課角度而言，馬匹操練、手法、進度，固然重要。係馬王又點，長期唔操得，靠「踱」維生，唔通又可以獨步天下？！可能一次半次冇問題，如果長此落去，唔會太樂觀。

　　至於晨課動態，又係咪要重視，依個人立場，呢方面唔能夠遺漏。正如上季初曾經推介過「友利多」，當時，好大程度係因為晨課動態先會理佢。記得季前有一朝，柏寶喺上落馬沙地嗰邊，等咗「友利多」好耐先進行操練，大大話話睇住佢呆等幾個字（雖然正在同人打緊牙骹），比較天真咁諗，唔係心中有馬，使乜嘥時間喺匹前季搏極唔贏嘅四班馬身上（結果上季一出即勝）。至於係咪晨課一有動靜就等同搏馬，梗係冇可能，點都要顧及其他條件哩。

馬會賽馬節目主持　洪禮賢