曼聯熱刺大解放 Sexy Football 攻到你暈

猪拉多纳

22/08/2011
文： 樂比堅尼

香港時間周二凌晨難得上演英超好戲碼，曼聯主場對熱刺，捱眼瞓都要睇啦！曼聯開鑼戰延續熱身賽強勢，以二比一擊敗西布朗，連續八仗開出「贏＋大」靚績，今仗對另一性感足球代表熱刺，勢演入球騷，樂比仔捧大盤！（有線200及300台周二凌晨3時直播）




曼聯近期入波當食生菜，熱身賽、社區盾加埋開鑼戰八仗入咗卅一球，幾乎每場入四粒，淨係自己一隊都夠開大。曼聯入波咁瘋狂，全因今季引進咗艾舒利楊格、菲爾鍾斯及迪基亞等後生仔，成隊波年輕化咗，自然更有朝氣同活力，為咗爭取表現，場場都搏到盡！


雙塔倦勤 紅魔穿窿


不過後生仔始終係後生仔，經驗點都差啲，尤其係曼聯一對中堅里奧費迪南及尼曼查維迪今仗均因傷缺陣，冇咗呢兩位經驗豐富嘅球員壓陣，「紅魔」後防有隱憂，雖然莊尼伊雲斯同菲爾鍾斯都係相當有潛質嘅球員，但欠缺里、尼其中一位大將傍住，好容易出事，加上門將迪基亞加盟曼聯以來頻頻出現蝦碌，曼聯今場失波一啲都唔奇！


歐霸大勝 熱刺猛火


熱刺首周聯賽因倫敦暴亂而取消，可養精蓄銳備戰今場大戰，不過佢哋踢呢場波之前，已經喺上周中嘅歐霸賽事熱身，作客大勝蘇超球會赫斯五比○，可見球隊狀態甚弗。




熱刺前線極多入球士哥拿，迪科爾、雲達華治同加里夫巴利都獨當一面，加上防線同樣有兩名大將京治及加拿斯養傷，門將靴里奴高美斯亦係出名嘅牛油手，今場捧大盤係最佳選擇！




單計聯賽，熱刺最近一次於奧脫福贏波已經係1989年，換句話講自英超成立以來，熱刺從未作客贏過曼聯。翻查近十季成績，熱刺作客曼聯只取得兩和八負，其中九次上半場全部食蛋，只有一次上半場領先過對手。