曼聯熱刺駁火「大」戰

猪拉多纳

22/08/2011
文： 亨格比利

英超今晚爆發重量級獨腳戲，由曼聯主場硬撼熱刺。齋睇往績，紅魔鬼近年一直食住對手，弊在佢哋3大護城守將都打柴，新加盟嘅龍門迪基亞又慌失失，焗住以攻為守；對家餓波餓到癲嘅熱刺條防線又係殘到甩晒轆，與其硬估邊隊贏，倒不如轉玩1.68倍「大」仲明智。（有線200、300及廣東體育周二凌晨3:00直播）


紅魔3大守將打柴


睇番往績，熱刺對上一次喺奧脫福揚威已經係1989年嘅事，加上紅魔鬼近6次主場鬥熱刺都贏晒，計往績熱刺就冇甜頭㗎嘞！之不過熱刺想話偷雞又唔係冇可能，事關被視為雲達沙接班人嘅迪基亞，繼社區盾畀迪斯高嘅遠射收死之後，首輪聯賽又係輸落地慢畀沙恩朗攻破大門，表現仍然畀唔到人信心。




更濕滯嘅係一對中堅里奧費迪南同尼曼查維迪齊齊打柴，右閘拉菲爾達施華亦要抖10周，4人防線冇咗3件，領隊費格遜焗住要搵莊尼伊雲斯、菲爾鍾斯同基斯史摩寧3位後生仔擔大旗，個城牆出現條咁大裂痕，熱刺要攻陷曼聯唔係冇機。


熱刺餓波誓破宿命


畢竟熱刺都成21年未試過作客砌低曼聯，今戰本住冇嘢好輸嘅心態落場肯定踢得夠放，何況因倫敦暴亂令首輪聯賽改期之後，熱刺班球員擺明勁餓波，上星期歐霸盃附加賽首回合作客都大炒赫斯5蛋，今晚仲有莫迪歷克服鼠蹊傷復出添，搭住艾朗連儂、加里夫巴利同雲達華治幾隻老鼠仔衝鋒陷陣，火力夠晒保證。




不過咁，熱刺條防線都好殘，中堅京治、加拿斯同右閘侯頓都養緊傷，頂唔頂得住由朗尼、拿尼同艾舒利楊格組成嘅攻擊鐵三角係一大疑問，既然大家都有前冇後，入波邊會少吖！