烏甸阿仙奴做「大」騷

猪拉多纳

24/08/2011
文： 阿占

阿仙奴嘅「末日」捍衞戰終於要爆發！開季黑到痹嘅兵工廠今晚作客烏甸，有乜差池踢唔到歐聯分組賽嘅話，唔單止收入會大大減少，班球員嘅士氣更會跌落谷底，隨時一沉不起。為「錢」途而戰嘅阿仙奴防線天殘地缺，同要收復失地嘅烏甸鬥攻似係唯一出路，我博入球大！（有線61、201及中央5台周四凌晨2:45直播）




尋日靚女拍檔阿Kit已經喺度爆料，話星期五深夜兩點嗰場「歐洲超級盃」─巴塞隆拿對波圖，可以透過i系智能手機下載有線個joemud應用軟件，免費睇直播，唔少球迷一知道都話Like！到時一於高清201、手機同步睇，咁樣睇波法都幾新鮮！禮拜五未有耐到，都係講番今晚繼續嘅歐聯附加賽次回合先。


兵工廠防線殘到嘔


阿仙奴首回合喺捱打嘅劣勢下小勝一球，今場條防線依然殘到死，睇嚟都係以攻為守、同對方死過好啦！主場出擊嘅烏甸尼斯為咗收復失地，冇得選擇下亦會同阿仙奴鬥攻！所以小弟覺得大有機會開入球大！




「天亡兵工廠」係唔少「阿」迷季初嘅慨嘆，法比加斯、基捷基治等主力走人、拿斯尼都賣走埋、開季即遇地獄賽程、傷兵停賽一大籮……似乎一切都係阿仙奴「末日之兆」！上場對利物浦受傷嘅哥斯尼加入「十字軍」，連埋之前已經養緊傷嘅基蘭基比斯、阿曼特查奧爾同史基拿斯，今場條防線只係啱啱好執夠四個人咋！


尹佩斯路斯基有望披甲


好在「爛船都有三斤釘」，至少上場聯賽停賽嘅謝雲奴同桑治可以復出，首回合坐波監嘅尹佩斯亦都可以候命，加上路斯基亦都有機會踢得番，中前場人腳其實都唔差。「兵工廠」要出線，惟有進攻先係最後出路，今場搶唔搶到作客入球會係關鍵。




烏甸尼斯夏天雖然都賣走幾個主力，但睇佢哋首回合嘅表現其實唔差，伊斯拿、艾曼紐巴度、比斯嘅中場線活力十足，為射手迪拿達利製造咗唔少機會。今晚主場出擊兼非勝不可，呢隊進攻型球隊唔使問實會喪攻陣殘嘅阿仙奴，兩隊都以攻代守，入球大最啱玩啦！

首回合：烏客負0:1

頂占筍盤：烏甸尼斯 Vs 阿仙奴‧入球大