里昂尖刀將卡山劈開

猪拉多纳

24/08/2011
文： 力奇

歐聯附加賽次回合今晚有早場大戰，由魯賓卡山喺主場迎戰里昂，力求收復首回合輸1:3嘅失地。雖則話俄羅斯球隊主場威力一向唔差，但魯賓卡山近況實在唔多掂，加上防線大走樣連續6場有失波，要贏來勢洶洶嘅里昂似乎難度頗高。平手盤我寧願捧里昂贏好過。（有線61、64、201、204及中央5台周四凌晨0:00直播）


魯賓卡山踢到殘


俄羅斯球隊主場惡氣夠，唔多唔少得益於佢哋冰天雪地天氣，可惜家陣仲係夏天，力奇查過當地天氣，風和日麗有8至18度，踢波最爽，主場優勢即時冇一截。




雖則話魯賓卡山喺俄超踢到季中上晒力，但查實可能係踢到殘至真，佢哋家陣喺國內聯賽排第5，爭標機會微乎其微，近4戰只得2和2負，仲要係已經連續6場有失波，合共失咗10球，都咪話唔得人驚。




里昂呢邊，雖然新開咧唔算好突出，但至少叫做喺歐洲賽同法甲踢咗4場波，共得2勝2和仲未輸過，少帥加迪領軍方式贏得唔少主力讚賞，士氣一流。再者，佢哋話就話連場惡戰冇乜點變陣，但考慮到家陣只係季初，球員要用比賽提升狀態，唔會咁易有疲態，兩大射手巴菲迪比高美斯同利辛度盧比斯都叫做腳風順，今次就算係踢作客波，都一樣信得過。


首回合：魯客負1:3