借題發揮：松風今季會好

猪拉多纳

　　姚本輝馬房「松風」，往績係單跳格局，一季好好哋，一季唔多掂，譬如08/09年首季，跑6場賽事，由田草1000至1400米，俱三甲不入。但前季嚟個180度轉變，上陣10場（1200至1600米），攞到4冠2亞1季2殿，只係得1場唔入前幾名，準得好犀利！

　　到咗上季又復現首季嘅「平淡」，6戰三班賽，冇1場攞到獎金，跑包尾仲試過兩次，賽績真係差得好緊要，或者腳傷係有一定程度影響（1月尾至5月中冇跑過）。

　　「松風」目前分數又回落至四班水平，未必完全凸顯優勢，不過，肯定比喺三班作賽易應付。

　　而因為「松風」本身跑法主動，往往在欠快步速嘅賽事中乘虛而入，尤其季初階段，所以，唔排除早早會發動攻勢。

Jack