洪禮賢講馬：攝製隊係無名英雄

猪拉多纳

　　之前曾經講過，真係佩服及致敬，喺馬場操馬嘅人士，天時暑熱都頂得順，1匹接1匹馬操呀操。雖然話打工係咁，收得人工，要襟鬧爛做冇詐型，不過，太陽猛烈又熱辣辣，孭住一身裝備跨上馬背，更好體能嘅，一樣唔易捱，所以，唔單只騎師喺賽事中搵命搏，其他在職嘅，同樣有風險。

　　日前有幸為馬會拍攝季前特輯，我唔使跨上馬背，又唔使喺草地跑嚟跑去，之但係，身心透支程度，仲勁過做三兩粒鐘健身。基本上，由大清早一直曬到黃昏咁滯（尚好有放飯時間），身上流嘅汗，三兩公升冇走雞，而恤衫、長褲，以至內衣，濕完又濕，着住只有黐立立感覺。

　　如果以為自己好辛苦咩？未免太唔體恤其他工友了，點解咁講，因為，除咗拍攝嘅主持之外，仲有一大班crew隨隊，佢哋真係無名英雄，我會流汗，唔通佢哋唔會，如果洪某流得三兩公升汗，佢哋至少1倍有多。個個孭住一大堆器材，又要喺戶外睇位度角度，曝曬機會比主持更多。最慘仲係啲主持如果唔生性，拍攝期間多NG，又要重新開始。

　　好似其中1位揸機嘅師兄，膊頭孭住幾十磅攝影機，正午時分喺草地來來回回十次八次（因嗰段我哋不斷食螺絲），冇中暑，算佢好彩。所以，特輯拍得好的話，班crew功勞都好大。

馬會賽馬節目主持　洪禮賢