西甲開鑼喇！蝙蝠兵賣仔捱細界

猪拉多纳

27/08/2011
文： 法比加輝

債台高築嘅華倫，去到今夏終於留唔住桑馬達，而上季回勇嘅祖亞昆亦已離隊。桑馬達係「蝙蝠兵團」近季進攻命脈，今次離開對球隊打擊好大。雖然華倫分別買入艾美利亞鋒將皮亞堤及基達菲中場柏利祖，又向皇馬借得攻擊中場簡拿利斯，牌面睇雖然得保攻力，但班波始終未夾熟，短時間內未必會擦出火花，今仗雖有主場之利兼且對手唔強，但實在好難大炒，預料小勝居多。




桑坦德一向缺乏財力，好大程度上都靠借人「維生」，季前兩名前線主力羅辛貝治同杜斯山度士，已重返雲達不來梅同熱刺，令攻力弱上加弱。但桑坦德都幾硬淨，上季頭三場作客聯賽，鬥華倫、西維爾同維拉利爾都係開細，再加埋近六次鬥華倫冇次開大，今仗捧細。


希杭主Ｗ揀得過


更早開波有希杭主場撼皇家蘇斯達，兩支中游對碰，今季希杭雖然冇乜新加盟球員，但佢哋一向靠主場搵食，而蘇斯達雖然借得卡路士韋拿，但整體實力冇大改善，而佢哋上季作客成績排尾二，今戰都係揀主勝穩陣。（now 632及660周日凌晨零時直播）