藍戰士撻着圍捕金絲雀

猪拉多纳

27/08/2011
文： 力奇

啱啱買入桑馬達同盧卡古嘅車路士，就同入滿油準備全速開動嘅戰車一樣，今晚佢哋喺英超主場圍捕新季未開齋嘅「金絲雀」諾域治，點會甩拖先？最緊要係「金絲雀」今季開咧2戰先後被對手取得38次射門，豆腐防線中門大開，想唔中伏都好難，我捧1.52倍「讓球主勝」。（有線200及300、廣東體育周六晚10:00直播）




車仔開咧2戰得1勝1和，表現未算對辦，上輪對住西布朗仲要係後來居上反勝，新帥保亞斯當然希望大勝一場振奮軍心。冇錯，佢哋今仗會有中場艾辛、後衞大衞雷斯同門將施治倦勤，但始終佢哋兵源充足，中後場影響唔會太大，門將之位由希拉里奧補上，上仗整體演出其實令我喜出望外，值得投下信心一票。


桑馬達或後備登場


再者，車仔近一個星期有新兵桑馬達同盧卡古加盟，其中西班牙國腳桑馬達更有望喺今晚以後備身份登場。正所謂有競爭先有進步，你估車仔班正選唔驚畀人搶走個正選位咩？今場梗會搏命啦！咪忘記仲有一點，就係桑馬達一旦落場，好有機會撻番着同胞射手費托，到時火力肯定大幅提升。




諾域治呢邊，開咧2戰2和表面睇唔失禮，實質只係對住韋根同史篤城呢啲中下游分子，真係咪睇佢哋太高。周中佢哋踢聯賽盃淨吞英甲米爾頓凱恩斯4蛋，狀態同實力擺明都係有限公司。


諾域治2戰被攻38次門


最恐怖嘅係我睇過數據，「金絲雀」開咧2戰竟然畀到人有38次攻門，雖然只失2球，不過車仔把握力，又何止好過韋根同史篤城4、5倍先？今仗入你3、4球又有幾難？睇怕「金絲雀」今晚作客史丹福橋球場，真係插翼都難飛咯！


橫數千軍


車仔近4次對賽全勝

‧近4次交手全勝，最少入3球。

‧近8場主場聯賽得7勝1和。

諾域治交手多交白卷

‧近7次交手有5次未能取得入波。

‧荷特為英超被侵犯最多球員。