心跳亂咁嚟難抗水手

猪拉多纳

27/08/2011
文： 走肖

亂入貨仲亂咁用，唔掂喎！去電器舖，都要睇清楚想買嘅係咪符合自己要求啦，點知清水心跳教練高迪比簽個左閘當防守中場用，認真嘥氣。今晚清水心跳喺日職主場對橫濱水手，唔似堵塞到防線漏洞，水手讓平半照捧。（now633及660台周六晚6:00直播）


村松坐波監高原傷埋


今季心跳由新教練高迪比執教，表現仲衰過以前，對上6場聯賽得1場保持清白，期間試過連續3場以0:4不敵大阪櫻花、廣島三箭同新潟天鵝，到佢簽到被海倫芬放棄嘅左閘莊亞賓，佢又將人哋當防守中場用，結果莊亞賓上陣2場，心跳依然勁失4球。更慘就係，心跳有最近坐穩正選嘅後衞村松大輔停賽，前鋒高原直泰又傷埋，咁嘅款邊似有運行？




對家方面，水手日前喺主場以2:1險勝大阪櫻花，靈魂人物中村俊輔完半場前冒住受傷危險入波，結果傷出離場，報道話中村左膝韌帶傷咗，要抖3、4個禮拜，但佢咁搏命，應該感染到隊友繼續搶3分。