拜仁1.45倍客W奏「凱」

猪拉多纳

27/08/2011
文： 吉拿甸奴

旺開，真係有條路架，凱沙羅頓今晚喺德甲主場對拜仁慕尼黑，好可能被攻到有氣冇碇抖，雖然拜仁射手馬里奧高美斯喺歐聯勇戰受傷，但經已火速好番可以趕及落場搏殺，仲有翼鋒洛賓傷愈復出，1.45倍客W熱都要捧。（有線61及64周六晚9:30直播）


凱沙羅頓首席射手離隊


由於奧歷未好番，搞到拜仁高層諗住加碼，動用1,500萬歐元收購弗賴堡前鋒柏比斯施斯，以防馬里奧高美斯同奧歷持續受到傷患困擾，不過咁，經過軍醫檢查後，「超級馬里奧」傷勢證實比想像中輕，今場可以照樣落場，呢啲咪行運一條龍囉，仲有呀，歐聯因傷缺陣嘅洛賓已經好番，早排喺自傳周圍辣火頭嘅拿姆亦公開道歉，可以專心比賽。




對家凱沙羅頓今季有首席射手拿傑離隊，結果開季3場聯賽得2個入球，話冇影響就呃你，而且凱沙羅頓現時傷兵唔少，新加盟嘅布魯日前鋒高文夏都唔踢得，主要靠來自特拉維夫夏普爾嘅前鋒舒捷達數胡，睇唔出有咩前途，更何況拜仁最近執番掂個後防，曾經被喪鬧嘅門將紐亞，更加連續4場冇失波，大打爭氣波帶挈拜仁連贏4場，睇怕凱沙羅頓要入波都唔易。