爵爺教授最佳敵‧友

猪拉多纳

28/08/2011
文： 樂比堅尼

英超領隊之中，執教同一支球會最耐嘅就係費格遜同雲格，呢兩位領隊一直水火不容，但隨着阿仙奴戰績下滑，車路士甚至曼城，取而代之成為曼聯頭號對手，費、雲二人嘅牙齒印早已冇以前咁深，費Sir近期更多次替雲格講好說話，大有識英雄、重英雄之感。




今時今日炒領隊成風，輸得兩、三場已話帥位不穩，環顧英格蘭四個級別聯賽，教同一支球會超過十年嘅只得三位，費格遜同雲格分別以24年及14年排首、兩位。




以往費格遜喺英超有好多老友，好似古比士利及艾拿戴斯，佢哋都有一定資歷，夠料同費爵爺把酒論英雄，而百年難得一見嘅「寸王」莫連奴，費爵爺都視佢為好對手。


新對手未夠班


但費Sir嘅昔日老友炒得嘅炒，走得嘅走，能夠配得上做佢對手嘅已經冇乜邊個。33歲嘅保亞斯？年紀只有老費一半唔夠；堅恩、羅渣士之流，更加係教預備組及青年軍出身，雖然話英雄莫問出處，但自視甚高嘅費格遜，難免覺得無敵是最寂寞，夜深人靜，老費突然憶起「教授」雲格呢位昔日眼中釘。




兩人性格雖然不同，費爺爵以紳士自居，鍾意賽馬及飲紅酒，而讀經濟出身嘅雲格，則被評為小器嘅算死草，但能夠同費格遜鬥足十幾年嘅，除咗雲格仲有邊個？費格遜近日意外撐死敵雲格，仲對佢賣走拿斯尼及法比加斯拍掌叫好，只因費格遜唔想冇咗呢位老對手，試問今時今日，仲有幾多人可以好似雲格咁，獨行獨斷堅持自己原則？