馬拉加烚熟西維爾

猪拉多纳

28/08/2011
文： Mic少

歐債危機燒到球壇，「歐豬」西班牙及意大利球員罷工浪潮此起彼落，烽煙四起人心惶惶，一時間球員嚮往嘅兩大聯賽變成煉獄。亂世之中，原來仲有一片樂土，就係西班牙南部小城馬拉加，在中東油資射住下，一批又一批著名老將舉家去當地養老，霎時令馬拉加「升呢」，今晚首戰作客西維爾，幾位老將圍埋「打邊爐」盡地一煲，馬拉加受讓平半捧下盤。




（now 632及660周一凌晨4時直播）




唔少人鄙視金錢足球，認為係用錢買獎盃，但講真如果呢個世界多啲阿布拉莫域、文梳亞呢類有心人，攞真金白銀出來支持球隊就天下太平，又使乜罷工。老闆要面，球員要錢，都係互惠互利，特別係年過三十，踏入球員生涯黃昏時期，更加要把握最後機會搵銀，令掛靴後生活無憂。


暴發戶狂掃名牌


卡塔爾酋長哈利法上年入主馬拉加後，球隊變成球星養老院，專收留過氣名將，繼上季簽阿根廷中堅迪米捷利斯、巴西中場巴迪斯達及意大利中場馬利斯卡等人後，今夏又搵來雲尼斯達萊、馬菲臣、杜拿蘭及祖亞昆等沙場老將，而最貴收購係維拉利爾中場辛迪卡索拉。或者大家會嫌前四者高峰期已過，但正所謂爛船都有三斤釘，發起威上嚟，相信好多後生仔都唔係佢哋嗰皮。




而且唔好忘記，西甲有好多球會莫財，球員前途未卜，影響比賽心情，反觀馬拉加薪高糧準，眾將士可以專心搏殺，呢點已比對手西維爾優勝好多。事實上，西維爾限米煮限飯，主要收購只係德國中場杜查奧斯基同基達菲前鋒迪摩奴，但亦放走快翼迪亞高卡普同中場大腦連拿度，睇球隊日前歐霸盃出局就知冇料到，西維爾上季聯賽主場都贏唔到馬拉加，依家更加讓唔起對手。


馬菲臣


位置：中堅

年齡：31歲

曾効力名牌：阿爾克馬爾、漢堡

荷蘭國腳級守衞馬菲臣，本身是威廉二世青訓產品，其後在德甲漢堡踢出名堂，成國家隊骨幹成員。馬菲臣唔單止截擊力強，後上助攻亦經常取得入球。

祖亞昆

位置：中場

年齡：30歲

曾効力名牌：貝迪斯、華倫西亞

西班牙一代飛翼，効力貝迪斯時期經常憑住飛快速度硬爆對手，不過已無復當年勇，現時速度唔算高，但仍保持傳中質素，於邊線頗具威脅力。

巴迪斯達

位置：中場/前鋒

年齡：29歲

曾効力名牌：西維爾、皇家馬德里、阿仙奴、羅馬

於巴甲聖保羅成名，除可擔任進攻中場外，亦可推前做正前鋒，佢體能相當好，有「巴西野獸」之稱，罰球處理亦相當有功架。

雲尼斯達萊

位置：前鋒　年齡：35歲

曾効力名牌：燕豪芬、曼聯、皇家馬德里、漢堡

荷蘭老牌射手，効力曼聯及皇馬時產量驚人，被視為球壇頂級入球機器。現時速度唔夠快，勝在把握力強，今次重返西甲預期會有理想演出。