弗爆射手Vs有料教頭 史浩克慕遜大激鬥

猪拉多纳

28/08/2011
文： Katie

幾經辛苦，Katie最近終於完成咗個課程，仲攞到Honor添，真係一身都鬆晒！今日放假有咩搞作？小妹梗係繼續做乖乖女陪屋企人飲茶，再同Daddy剝住花生睇成晚波啦！上星期Tip中咗流浪砌低馬瑟韋爾，今日一於再接再厲，希望史浩克04對慕遜加柏嘅1.7倍「大」幫到大家。（有線61、64及204周日晚11:30直播）




咪話Katie認叻，今次能夠完成任務攞到Honor，自己夠勤力溫習當然係主因，但更重要嘅係多得Miss、阿Sir嘅悉心指導。小妹有好導師指點迷津，德甲隊慕遜加柏亦有個好教練揸旗，講緊邊個？之唔係法夫爾囉！


亨特拉爾近4戰入8粒


呢位瑞士籍教頭上年2月上任，首次領軍就爆冷擊敗史浩克，今晚雙方狹路相逢，慕遜體育總監艾貝爾同中場托賓麥斯都話要重溫好夢，作客都要以全取3分做目標，咁即係唔慌踢得保守啦！慕遜新季已經先後做低拜仁兼大炒禾夫斯堡，弗成咁冇嘢冇可能㗎！




慕遜加柏當頭起，史浩克呢排亦夠晒勇，聯賽、歐霸盃兩條戰線都贏到開巷，近4場波加埋喪入15球，當中荷蘭射手亨特拉爾就包辦咗8個「士哥」，今晚佢同Katie最欣賞嘅魯爾合作攻堅，隨時又再炮製一場入球騷畀球迷欣賞，睇怕呢場「大」龍鳳實做得成。


微博傳情


眨下眼就快到9月，Katie今年一次船P都未出席過，點解？咪因為唔夠Fit，唔想着泳衣出嚟獻醜囉！所以我最近就喪做運動，一個禮拜跳成5日舞，Funky、Hip Hop乜都跳，家陣開始有啲成果，希望下次可以同大家分享吓我嘅泳衣照啦！^^


Katie推介：史浩克04（入球大）


外國長大，半個鬼妹仔，自細因爸爸成日帶朋友返屋企睇波而愛上足球，鍾意睇靚仔但唔會盲目追捧，最緊要係好波。