小保加入球細啱「素」 列基美打柴無人派牌

猪拉多纳

28/08/2011
文： BlackJack

玻璃腳即係玻璃腳，開季先踢咗3場，列基美又整傷右邊大腿筋要抖，今晚小保加响主場對聖羅倫素，唔好期望有大手交易，一於攞呢場個入球細，過落去名古屋鯨魚入球大，同埋士砵亭「讓球主勝」度。


聖羅倫素兩連勝守得住


小保加開咧2勝1和排阿甲第2，個頭開得唔錯，點知「大腦」列基美又再傷過，今場波披甲機會比較微，益晒綽號「旋風」嘅客軍聖羅倫素。其實聖羅倫素係阿甲傳統五大球會之一，同小保加、獨立、河床同競賽會齊名，雖然佢哋作客小保加嘅往績比較輸蝕，近6次得2勝4負，但係近況唔曳，取得兩連勝，連後衞柏洛文奴都話兩隊波狀態一齊升緊，有信心响「糖果盒」守死小保加，所以入球細諗得過。


串鯨魚「大」士砵亭「讓主」


日職名古屋鯨魚對甲府風林場波，主隊多咁件丹尼臣哥度巴養傷，甲府亦傷咗件石原克哉，大家搏起拳嚟始終係鯨魚着數。況且鯨魚呢場波搬去豐田球場踢，佢哋今季响呢個場出擊5次，只得1次開0:0，其餘次次坐底入兩粒，梗係博入球大啦！




至於葡超士砵亭對馬里迪莫，主隊開咧兩連和，擺明係留力歐霸盃之故，今場終於可以專心博開齋，要數「私房菜」馬里迪莫兩粒又有幾難呀！