洪禮賢講馬：「應該」好脆弱

猪拉多纳

　　從前認識1位馬主，佢賭錢有個習性，如果佢覺得嗰期賽事，騎師又好，練馬師都好，有一手強兵的話，一定會買「連扣」，因為喺呢位馬主心目中，如有大手馬出戰，起孖係「應該」！

　　洪某當然唔多認同，事關有一批馬安排好晒同日搏，並唔係等同必會起孖，此其一；又如果「扣」唔正嗰匹重心，啲纜斷九成，到時莫講話起孖，1場都冇得中，「連扣」啲本亦保唔住。　實在，大千世界，有咩會係「應該」，根本冇！冇嘢係有保證，好朋友一樣有可能喺你後面捅一刀、金婚老伴可以離異。總之，「應該」二字，其實好脆弱，唔係你就唔係你。

　　不過，單日大軍壓境，又唔係實冇機會贏到開巷，上季練榜前三名，大摩、告東尼及蔡約翰，佢哋喺上季經常同日多捷，前者有16次起孖，後兩者各有15次。至於單日3捷嘅馬房唔係好多，得9個啫，4捷就更少，係得摩、蔡及葉。咁正常情況下，邊個馬房贏馬較多，同日多捷機會直接提高，但睇番單日3捷最多嗰個係方嘉柏（5次），照咁睇，阿方真係幾鍾意連環搏。

馬會賽馬節目主持　洪禮賢