巴塞3大神箭轟爆漏水潛艇

猪拉多纳

29/08/2011
文： 力奇

開季冇耐即刻連贏2個冠軍嘅巴塞隆拿，已經證明新季佢哋仍然係「地上最強」。今晚輪到西甲遲來嘅開咧，仲要畀巴塞喺主場出擊，兼有「智利C朗」阿歷斯山齊士做魯營首演，同美斯、韋拿合組神級3箭頭，要大炒冇晒重心、變咗隻漏水潛艇嘅維拉利爾有幾難？一於熱食1.48倍「讓球主勝」啦！（now632及635台周二凌晨3:00直播）




半力兼冇態照樣擊敗皇馬贏得西超盃，巴塞去到上周五踢歐超盃又輕鬆贏埋波圖2球奪標，狀態亦明顯漸入佳境。查實佢哋嘅質素同踢法，根本係「宇宙最強」，基本上環顧全球，好難有一隊波可以阻擋到佢哋！當然，你可以挑剔佢哋今戰條防線唔完整，《每日體育報》尋晚話5件守將包括雙中堅佩奧爾、碧基，右閘丹尼爾同兩隻左閘艾迪安奴同麥士維齊齊打柴，不過咁又點？「佩奧爾+碧基」一早已經冇用幾場波啦，皇馬同波圖咪一樣冇晒佢哋符！


兩大鬥牛新星鎮守中路


同時，哥帥已安排馬斯真蘭奴串演右閘，艾比度則踢番左閘，中路由一對新進國腳方達斯同馬田蒙度亞鎮守，方達斯之前已經話過畀大家知佢有幾掂，至於馬田蒙度亞大家亦唔可以睇小，事關佢係西班牙攞U21歐國盃冠軍嘅主將，佢之前一路都踢緊西乙巴塞B隊，點知竟然都獲提升為大國腳，可見呢條細路唔講得笑！




防守唔成問題，中前場就更加令人放心！事實上，為咗打好今場開咧戰，哥帥喺歐超盃60分鐘就收起韋拿，又叫腳傷初愈嘅「A山」阿歷斯山齊士出嚟熱身跑吓。之前A山喺西超盃次回合坐足全場，今晚先係佢嘅魯營正式首演，佢同韋拿、「球王」美斯都係神級箭頭，三神聯手，威力仲唔係無堅不摧？


維拉利爾冇卡索拉差好遠


維拉利爾今夏放走中場重心辛迪卡索拉，就好似架失去動力嘅漏水潛艇一樣，最慘係佢哋又冇搵人返嚟頂佢個位，無論攻守實力都大受影響，好彩維拉利爾叫做保得住射手基奧斯比羅斯，否則連前四都唔使預佢哋。睇番「潛艇」之前踢歐聯外圍賽，作客對住奧丹斯都輸得0:1，今次嚟到魯營，想輸少粒都難啦！