洪禮賢講馬:季初宜「帶眼識人」

猪拉多纳

　　開鑼日漸近，仲有十幾日又到，報名未出，未有咩可以度。而每每喺季前，總係會有啲馬房，喺晨課特別有誠意，擺到明想趁季初先揩揩油水，作為振奮士氣又好，有個好開始都好。至於喺季前操到砰砰嘭，係咪又代表實得，個別馬房啦！有小部分真係得「殼」，操得唔打得，季初一落場即刻企喺度，唔信唔信又1隻。對嗰啲馬房，的確要「帶眼識人」。

　　之前都講過吓，有啲大馬房可以作為季初「水泡」，無他嘅，廐內兵多，點都要井然地鋪排旗下馬出賽時間表，一批批輪住出，唔想塞埋喺同一時段，季初、季中及季尾，一定要分得勻！

　　咁做得大馬房，時間表一定會分得勻，並持之以恆，如果唔係，又點會長久以來屹立不倒。亦因為佢哋喺呢方面有晒計劃，好少會出岔子，所以，季初階段，吼住部分慣性有攻勢嘅馬房，係會有揸拿。

　　以告東尼為例，前季開鑼日交到3W2P，上季雖然冇咁叻，亦有1W3P，點都唔會輸到冇晒影。總好過吼啲以為季初做好晒嘢，實會喺9月有攻勢，點知到頭來輸到嘔泡嘅馬房，起碼條氣順啲。

洪禮賢