美聯盃4強爆西岸激戰 西雅圖大起達拉斯

猪拉多纳

30/08/2011
文： Mic少

美國東岸近日受颶風吹襲，搞到上周末多場美職改期，不過明早美聯盃四強如期舉行，上屆冠軍西雅圖海灣者迎戰FC達拉斯。兩隊喺常規賽西岸爭崩頭，轉戰盃賽更加想趁機挫對手銳氣，以雙方近期勇態，惡鬥入波唔會少，捧入球「大」。（周三早上10時開賽）


芝加哥夠力數乙組仔


今場比賽安排喺華盛頓土克維拉星火體育場舉行，雖然唔係海灣者慣用嘅主場，但鄰近西雅圖，海灣者始終有地利優勢。海灣者有微軟創辦人之一嘅保羅艾倫撐腰，堪稱「美職曼城」，對大小盃賽都唔會放過，球隊自○九年加入美職後，已連奪兩屆美聯盃冠軍，當正呢項賽事係「私房菜」，爭標決心毋須懷疑。而且海灣者狀態當弗，上仗聯賽大勝哥倫布機員六比二，今仗遇勁敵FC達拉斯，更加唔會手軟。




至於FC達拉斯依家喺常規賽西岸比海灣者少兩分排第三，球隊早前喺聯賽輸畀海灣者，更加希望報仇。FC達拉斯作客三連勝，以呢個走勢，今場起碼應該有波入。




另一場芝加哥火燄主場對乙組仔列治文踢球者，兩軍實力懸殊，捧火燄「讓球主勝」。