英格蘭魔性大發 曼市聯軍襲保加利亞

猪拉多纳

02/09/2011
文： 樂比堅尼

歐洲國家盃外圍賽今晚重燃戰火，重頭戲係G組英格蘭作客「玫瑰之國」保加利亞。曼徹斯特雙雄季初冒起，令陣中土炮如朗尼、艾舒利楊格等都打起信心，如今化敵為友，面對近年青黃不接嘅保加利亞，相信可將紅魔進攻足球帶進國家隊，樂比仔建議捧大盤。（有線61及201台周六凌晨2時15分直播）




以往嘅英格蘭國家隊，人腳較為分散，但自從英超實施外援限制後，豪門爭相羅致本土球員，令國腳集中喺某幾支強隊，以今次英軍為例，大戶曼城同曼聯分別有六個及五個球員入選，另外車路士亦有三人。


曼聯小將弗爆


其實咁嘅安排，最大得益就係英格蘭國家隊，首先班球員喺球會夾慣夾熟，默契自然較佳，就算嚟到國家隊都識自動波，另外部分小將如基斯史摩寧、湯卡華利等，長期喺高水平比賽，見慣大場面，比賽信心亦增強不小，即係球會間接幫國家隊練兵。




保加利亞九十年代曾風光一時，但近年處於青黃不接階段，世界排名急跌，自主將貝碧托夫退出國際賽後，成績更一落千丈，近三仗主場都贏唔到，分組賽成績亦令人失望，五戰僅贏一仗，作客英格蘭更慘吞四蛋。




其實英格蘭多年來都食住保加利亞，如今兩隊實力一起一跌，差距更加大，樂比仔對英軍贏波頗具信心，但鑑於保加利亞都有一定攻力，故今場首選都係捧大盤！


英格蘭對保加利亞往績


日期 賽事 戰果（半場）

04/09/10 歐國外 英主勝4:0（1:0）

09/06/99 歐國外 英客和1:1（1:1）

10/10/98 歐國外 英主和0:0（0:0）

27/03/96 熱身賽 英主勝1:0（1:0）

22/11/79 歐國外 英主勝2:0（1:0）

06/06/79 歐國外 英客勝3:0（1:0）

01/06/74 熱身賽 英客勝1:0（1:0）

11/12/68 熱身賽 英主和1:1（1:1）

07/06/62 世界盃 英中和0:0（0:0）