成手靚牌準備炸人 德軍搶住做地主

猪拉多纳

02/09/2011
文： 蘇斯黑柴

歐國盃外圍賽Ａ組擂台躉德國今晚主場迎戰奧地利，目前七戰全勝嘅德國只要今晚贏波，即可成為首支進身明年波蘭與烏克蘭合辦嘅決賽周隊伍，並力圖挑戰該國從未試過嘅外圍賽全勝滿分紀錄，有力大炒熟路弱旅奧地利，若嫌1.4倍「讓球主勝」冇肉食，可捧2.02倍嘅大盤。（now 633周六凌晨2時45分直播）




德國今仗賽前有多名主力因傷退隊，包括門將艾達、中場基迪拉、施雲賓達、馬高列奧斯同箭頭馬里奧高美斯，但有梅迪薩卡同奧斯爾傷愈歸隊，領隊勒夫亦補選咗史特加前鋒卡卡奧同漢諾威年輕門將薛拿入伍。球隊近期狀態大勇，除保持外圍賽全勝外，熱身賽亦以3:2擊敗宿敵巴西。球隊下周中只需要同波蘭踢熱身賽，今仗無後顧之憂下，可以全力爭取大勝。


中場猛將太多好難揀


勒夫今仗面對幸福的煩惱，單計中場線，佢哋已經有舒韋恩史迪加、奧斯爾、湯馬士梅拿、普多斯基、路菲斯同卻奧斯等猛將，加上最近竄紅嘅馬里奧葛斯同舒賀爾尼，搞到唔知出邊個好，前線老將高路斯正挑戰名宿蓋德梅拿嘅68個國家隊入球紀錄，目前佢已入61球，喺今屆外圍賽5次上陣入8球，其中4次仲取得首名入球，今晚主場遇弱旅必然把握機會盡數，首名入球有4倍亦諗得過。


奧地利留力鬥土耳其


奧地利近7仗輸6場，唯一勝仗只係熱身賽主場贏弱旅拉脫維亞，今仗仲有効力西布朗嘅中場大將舒卓拿停賽，加上近6次對德國輸晒，最近一次作客更以2:6慘敗，今仗強弱懸殊，考慮到奧地利出線未絕望，今晚落後隨時放軟手腳，留力四日後主場對土耳其嘅關鍵戰。不過，奧地利今仗有効力雲達不來梅嘅射手阿拿奧杜域復出，分分鐘入到波，大細中位數調整到3.5球都要捧大盤。