甘馬曹打攻搶頭彩 中國大起獅城

猪拉多纳

02/09/2011
文： 渡邊年

世界盃亞洲區二十強開打，A組中國強勢出擊對新加坡，希望取得開門紅。中國足協重金聘請甘馬曹做主教練，就係希望可以繼02年後，再度殺入世界盃決賽周，甘馬曹召入大部分曾到海外發展球員，希望用經驗制敵，不過，新加坡有多個歸化球員，技術及身高都唔輸蝕，呢場都有機會入到波，站在投X角度，今場選擇買大更好。




（廣東體育及中央5台周五晚8時直播）




中國同伊拉克、約旦及新加坡同組，因每組頭兩隊入最後十強，原則上中國喺呢組實力都比其餘對手強，出線相信問題唔大。




廿強戰某程度上嚟講，係畀機會新帥甘馬曹同一班球員融合，甘馬曹喺執教國足前未嚟過中國，六場廿強分組賽畀佢重新調校國足嘅足球文化、紀律及戰術等，佢今次召入李瑋鋒、鄭智、蒿俊閔及于大寶等曾於海外効力嘅球員，亦係方便自己執行喺歐洲嘅一套。


揚言踢進攻足球


甘馬曹喺教奧沙辛拿時比較保守，但相信係因為實力問題，國足喺亞洲嘅情況唔同奧沙辛拿喺西甲咁捱打，事實上，甘馬曹喺賽前記者會亦講明，喺主場作賽，中國將以進攻為主，唔會將精力放喺防守，而喺操練上，甘馬曹除咗死球外，連前半場界外球點樣部署進攻都練咗幾日，相信係針對新加坡防守較弱呢點訓練。




至於新加坡實力雖已今非昔比，但今仗備戰認真，除上周安排咗一場熱身賽對泰國，亦提早到中國適應，相信都可以取得入球，今場揀入球大啦。