Big5英格蘭強爆保加利亞

猪拉多纳

02/09/2011
文： 阿占

英超開咗鑼雖然未夠一個月，但相信大家都會覺得曼市雙雄已經超晒班！今周聯賽要讓路畀歐洲國家盃外圍賽，球迷繼續可以欣賞到英超球星嘅演出，事關今晚幾近夫添、由Big5組成嘅英格蘭，會喺G組作客保加利亞，「曼市大佬」朗尼近期弗到爆，一於食住個勢，撐英格蘭作客贏保加利亞！（有線61、64、201及204周六凌晨2:15直播）




英格蘭一直畀人話無人接班，不過曼聯今季打起咗幾件新兵，菲爾鍾斯、艾舒利楊格同湯卡華利等都踢到曉飛，卡比路亦將佢哋通通提拔上國家隊，即使呢3位新星未必有正選，但「三獅兵」陣中依然有植髮後信心爆棚嘅「曼市球王」朗尼，曼聯喺英格蘭嘅勢力唔講得笑。




另邊廂嘅曼城，都有赫特、巴利、尼史葛、米卡李察士同占士米拿等主力入選，呢幾位球星今季喺英超表現勁Sharp醒，咪忘記「舊英超Big4」成員之一嘅車仔中場林柏特、紅軍箭頭安祖卡路爾同阿仙奴翼鋒禾確特等都喺陣中，呢支「Big5英格蘭」確係超晒班！


三獅兵得2主力打柴


係，英格蘭賽前有羅拔格連受傷退隊，韋舒亞、韋碧克、謝拉特同里奧亦要養傷，不過呢批人當中，只得謝四同里奧係常規正選，換句話講，依家隊英格蘭正選入面，有9大球星係必然主力，今戰難得係「三獅兵」近年最完整嘅陣容，點會咬唔入保加利亞先？


保加利亞冇晒鋒力


主隊保加利亞今非昔比，最有卡士嗰位貝碧托夫退役後，國家隊到依家都搵唔到一個具級數嘅射手頂替，所以踢咗5場分組賽只入得2球，出線凍過水。今鋪主場對住如狼似虎嘅英格蘭，睇怕都係交學費居多！呢個英格蘭1.6倍客勝，夠晒穩陣！


橫數千軍


 保國連開4口細

近5次對碰有4次開入球細。

連續4場比賽開出入球細。

 英格蘭對賽不敗

近6次對賽錄得4勝2和未輸過。

連續4場比賽不敗，錄得2勝2和。