甘馬曹首演落格殺令 國足高原恰死新加坡

猪拉多纳

02/09/2011
文： 吉拿甸奴

甘馬曹＋格殺令＋高原主場，國足今晚喺世盃亞洲區第3圈外圍賽A組主場對新加坡，唔贏真係對唔住鄉里。呢場係甘馬曹上任後國足首演，賽前佢落柯打要攞足3分，加上昆明高原主場有不敗神話撐住，對住亞洲雜牌軍新加坡點可以唔開1.43倍「讓球主勝」？（廣東體育及中央5台周五晚8:00直播）




坦白講，甘馬曹教波唔算叻得去邊，以往佢帶西班牙國家隊同皇馬都係失敗收場，但新官上任三把火，今次佢棄用高洪波愛將前鋒韓鵬同中堅趙鵬，連曾經外流嘅中場蒿俊閔同中堅馮瀟霆都話要做後備，據講佢仲拗贏埋中國足協，任命後防老大哥李瑋峰重新做隊長，就算佢執教功力普通，總算不失霸氣，撐得過。


昆明出賽未輸過


雖然國足有中鋒郜林同中場鄧卓翔因傷冇入選，影響前線火力，不過全北汽車中場黃博文今季弗到漏，配合楊旭、陳濤同鄭智組成攻擊陣，依然睇頭十足，更何況，自85年起國足喺昆明踢10場有8勝2和，甘馬曹知道踢埋今場，國足就要揀第二度做主場，所以落格殺令要延續高原神話，講明袋足3分至收貨。


新加坡拉雜成軍


至於對家新加坡，其實已提早到昆明適應高原環境，可惜佢哋根本係拉雜成軍，唔知屬於中國足球咩級數嘅前鋒邱禮同中場施佳懿，入籍後竟然可以做主力，分別喺南斯拉夫同英國出世嘅40歲前鋒杜歷同33歲後衞丹尼爾賓尼特，又話仲打緊正選，上次老撾作客昆明輸2:7，今場新加坡想偷雞冇咁易。


世盃亞洲區外圍分組形勢


A組




中國/ 約旦/ 伊拉克/ 新加坡

B組

南韓/ 科威特/ 阿聯酋/ 黎巴嫩

C組

日本/ 烏茲別克/ 北韓/ 塔吉克

D組

沙特阿拉伯/ 阿曼/ 泰國/ 澳洲

E組

巴林/ 卡塔爾/ 印尼/ 伊朗