奧咸「海鮮波」哈特斯菲爾德秤先

猪拉多纳

03/09/2011
文： 亨格比利

4大聯賽冇波踢，英甲戰線就依然激戰連場，其中升班熱門哈特斯菲爾德雖然有魯迪斯缺陣，但呢班波勝在鋒線多選擇，造訪表現「海鮮」嘅奧咸當然可以秤先，1.95倍客W值得捧場。（開賽時間：周六晚10:00）


攻擊點多火力猛


上季為哈特斯菲爾德攻入23球嘅魯迪斯要為蘇格蘭U21披甲，今晚肯定缺陣，但相信領隊李爾奇勒一樣冇有怕！事關阿倫李爾上周終打破入球荒，洛華克又喺周中完場前入波協助球隊殺入英錦次圈，兩位射手信心返晒嚟，配合前愛華頓「神童」卡丹馬達利攻堅，火力一樣咁堅。




主隊奧咸前排先喺同市打吡砌低羅奇代爾，轉過頭竟然慘敗畀高車士打1:4，表現不穩之餘，隊長戴亞蒙賽後更加炮轟隊友夢遊球場引發罵戰，陣營氣氛都幾僵。領隊迪高夫日前簽入布力般舊隊友古基，呢位前芬蘭國腳係有卡士，弊在自從去季畀紐卡素放棄之後一直冇班落，狀態麻麻唔似會起到即時作用，想喺有鐵衞彼得奇勒傷愈復出嘅哈特斯菲爾德後防搵着數？唔輸都偷笑啦！