搞番電台直播至啱數！

猪拉多纳

04/09/2011


球季開鑼，今季特別熱鬧，各甲組會積極擴軍，佢哋亦好落力搞宣傳，出盡法寶吸引人們眼球，仲有收費電視台直播添，不過波男覺得未夠圓滿，如果加埋電台開咪播波，咁就Very Good嘞。




本地波以前有電台直播，講波佬靠把口將現場情況講畀聽眾聽，好多時入場球迷都會攞住部收音機聽波，至於唔得閒入場嘅球迷，更加要靠電台至知現場情況，不過電台近年唔再搞播波，令球迷少咗好多娛樂。


聽波樂趣多


聽波嘅好處多多，除咗了解比賽過程，最重要係聽講波佬嘅評述同分析，好似尋日場揭幕戰咁，望住雙方球來球往，熟悉兩隊嘅球迷當然唔覺得有問題，但遇着啲平日冇睇波嘅粉絲，電台評述就好有用處，聽住佢哋講波，就可以了解晒成個情況。




電台播波，好多時都會比電視直播講得更放，除咗現場分析，仲會幫球員改吓花名，同埋講好多球圈軼事畀球迷分享，增加睇波嘅樂趣。




今年初銀牌決賽南華對公民，電台曾經做過講波直播，可惜只此一場，由於種種原因，之後嘅賀歲波已經冇再搞，唔知要等幾耐先至有下次，今季既然搞得收費電視直播，唔差在搞埋電台直播，本地波先至更有Noise吖嘛！




波男