英軍派蛋威爾斯

猪拉多纳

06/09/2011
文： 麥馬拿仁

大佬出招必打真軍，細佬又點頂得住？歐國盃G組外圍賽「大不列顛兄弟相殘」，英格蘭「曼市大軍」弗到漏，朗尼有微傷在身一樣落場搏殺，球隊熟晒威爾斯踢法、虛實，連作客都贏兩粒，主場炒味極濃，嫌「讓球主勝」冇肉食，可直取3:0、4:0波膽！（now 671及now 672周三凌晨2時45分直播）




英超剛開咧，曼聯同曼城嘅球員勒都勒唔住，幾名主力朗尼、艾舒利楊格、巴利、基斯史摩寧、赫特上晒身，英格蘭上仗就兵不血刃作客數保加利亞三比○，朗尼梅開二度，「三獅兵團」弗到咁，千祈咪拗頸捧對家。


「三獅兵團」唔熟唔食


自去年十月於溫布萊贈保加利亞四蛋後，原來英軍已四場未喺主場贏過，係近三十年來最曳主場戰績，但球員驚都未驚過，賽前受訪都對今場贏波充滿信心。事實上，「三獅兵團」對威爾斯球員特性、戰術瞭如指掌，除比拿美、加里夫巴利及艾朗藍斯外，其餘球員逐個同英軍秤起碼輸兩班波，預期英軍可輕鬆控制大局，以一眾攻擊手近期腳風，要大炒威爾斯唔難。




威爾斯上仗擊敗黑山，取得小組首場勝仗，亦係今次外圍賽首次攞到分數。事實上威爾斯人腳參差，除上述提及嘅幾位英超球星外，其他成員都係來自英超弱旅甚至英冠球隊，踢法單調毫無板斧，尤其係對「大佬」英格蘭，根本連破蛋都難，所以捧3:0、4:0波膽真係有得博，起碼賠率唔錯。




不過英格蘭近日出現唔少傷兵，繼前鋒戴倫賓特及右閘米卡李察士因傷退隊後，左閘巴尼斯亦喺操練時受傷，無緣今場比賽，令後備兵源捉襟見肘，意味領隊卡比路好大機會以上陣正選人腳對付威爾斯。卡帥亦指老將林柏特仍然屬於球隊重要一員，唔排除有望復任正選。