荷蘭3「芬」袋袋平安

猪拉多纳

06/09/2011
文： 阿占

歐國盃外圍賽E組今晚有場「雙蘭」大戰，由芬蘭對荷蘭。「橙衣兵團」雖然有唔少傷兵，但勝在兵力雄厚，尤其係前場爭位異常激烈，好似尹佩斯、亨特拉爾、古積特等個個爭住「騷哥利」求保正選位置，睇怕芬蘭都幾難頂得住，捧荷蘭2.05倍「讓客」！（有線61、64、201及204周三凌晨1:00直播）


平均每場入4.5球


荷蘭貴為2010世界盃亞軍，小弟認為佢哋嘅班底喺歐洲只係僅次於西班牙。雖然領隊雲馬維克今場缺少咗受傷嘅雲達華治、洛賓、阿費利等可用，但係補選咗燕豪芬中場謝明蘭斯都唔係泛泛之輩，加埋啱啱轉會祖雲達斯嘅前鋒艾利亞，呢班新世代都有力挑戰尹佩斯、古積特等老將位置。




再者，「橙衣兵團」上仗大炒聖馬力諾11:0，當中尹佩斯個人獨取4粒，加上亨特拉爾今季又鹹魚翻生，以荷蘭分組賽7場入32球，平均每場入4.5球嘅鋒力，睇怕芬蘭今場聽做炮灰都得喇！


芬蘭輸質素往績


至於正處於重建階段嘅芬蘭，近年亦未見出現好似以前希比亞、列馬倫呢類級數嘅超新星出現，比較有星味嘅中場路文艾林文高亦因為膝傷今場出唔到。如果仲要靠年華老去嘅前車路士前鋒科素去硬撼「橙衣兵團」，咁同以卵擊石無咩分別。老實講，芬蘭近6次對住荷蘭，僅得1次守得住唔使輸，其餘5次都輸波而回，球員質素同心理都輸晒，所以我有信心，荷蘭呢場一定可以輕鬆奏凱。




歐國盃外圍賽E組