洪禮賢講馬：皇帝法令演出穩定

猪拉多纳

　　第九場三班1200米。「皇帝法令」與「熊英雄」相差15磅，係咪將實力拉近？呢點值得考量。後駒固然係堅，但問題有兩個，其一，霍廐好少好少喺季初頭一期就有馬入圍，至少對上3季都冇（最叻嗰匹跑獲殿軍）；其二，直路賽轉到1200米，唔認為適應唔到，但係咪初跑都咁勁，真係兩睇啫。

　　「皇帝法令」喺路程、近況上，應比「熊英雄」或勝一籌，加上向來演出準，陣上有晒責任心（連同外地，5場得2冠2亞1殿），就算季內初出，交到應有水準嘅成數唔低。再者，跑法上亦以前駒較安心，守好位比較夾到今場形勢，所以搵馬膽會揀先。

　　第十場三班1400米。「中環英雄」計能力，唔會比同場對手失色，唔好計再之前打低7捷明星「雄心威龍」，上季轉倉後首戰，喺1400米擊敗「如願以償」，賽績好有水準。

　　由於「中環英雄」贏完再跑兩場唔係真輸，1場跑到騎師被罰，另1場賽後驗到有事，停留喺72分真係幾着數。此外，暑後復操，進度嚟得唔錯，大閘、大圈試跑畀人感覺輕爽，只要潘頓喺發揮上做得足，今場隻馬喺拉士，一定有得爆段勁。

馬會賽馬節目主持