迪斯高弗爆曼城開大餐

猪拉多纳

10/09/2011
文： 車車

隔咗成個禮拜冇得睇英超，呢兩晚一於睇番夠本！原本英超傳統BIG 4講緊都係車路士、曼聯、利物浦同阿仙奴，估唔到暫時踢咗三輪，「兵工廠」個位就畀咗曼城！




曼城真係愈嚟愈唔簡單喇，上季已經咬住同市宿敵「紅魔鬼」唔放，今季再勁啲，開季以來兩支曼市球隊都係三戰全勝，得失球差只係相差一球咋。曼聯呢邊有朗尼係咁入波，而曼城亦都唔輸蝕有迪斯高，佢兩個同樣係連續三場聯賽有「士哥」，不過迪斯高仲叻少少，上場對熱刺個人連入四球！睇嚟今晚曼城對韋根呢場波，韋根都係凶多吉少。（有線202及302台周六晚10時直播）


贏韋根易過飲竹蔗茅根


韋根雖然暫時力保不敗，但上季都係護級分子之一。今季頭三場賽事佢哋面對嘅只係升班馬，難度唔高。相反，曼城除第一場波輕鬆贏史雲斯外，近兩場分別對住保頓同熱刺都唔係易搞架，但都可以畀依家人多勢眾嘅曼城贏到，仲要兩場都開入球大！可想而知，今季曼城根本唔只要求贏波咁簡單，佢哋贏之餘仲要多波入，一於以曼聯為假想敵。




雖然，曼城同韋根近五次對賽，得一次開入球大，但曼城已急劇升呢，雖然後防方面仍然有待改善，但要贏韋根，簡直易過飲竹蔗茅根，一於今晚再整多場「入球騷」啦！


有線球彩台主持車車


「車車」在1998世界盃至今已成「資深球迷」，2001年起在電台主持年輕人節目，2005年起主持電台足球節目，2010年底加入球彩台，主持《球彩俱樂部》及《球盤龍門陣》，並參與每周足球賽事直播。




PHONE波熱線：1831 678

電郵：soccer64@cabletv.com.hk

「超級星期六」開放時間：晚上9:00至深夜2:30