皇馬大騷Encore

猪拉多纳

10/09/2011


經過一輪國際賽後聯賽重開，皇家馬德里將於主場對基達菲，「雙雄」皇馬、巴塞近年壟斷西甲，今季情況似乎比過去幾季更明顯，「艦長」莫連奴會沿用首戰大炒薩拉戈薩嘅陣容出賽，但客隊基達菲就比較苦惱，事關球隊正鬧「中堅荒」，盧普、文尼、拉法盧比斯及阿柏達斯都因傷難望上陣，可謂益晒皇馬，料「艦隊」喺主場又可大炒一場。




（now 632周日凌晨2時直播）




皇馬一眾國腳總算未有因為應付國際賽而受傷，大部分都健康歸隊，而盛傳不和嘅比比及卡維奴，前者亦已開腔稱兩人根本冇心病，只係傳媒炒作，尋日仲影新球季大合照，個個有講有笑添。基於皇馬首戰已經作客大炒薩拉戈薩六比○，所以教練莫連奴亦會沿用上場陣容，務求延續大勝戰績。




反觀基達菲今仗人腳唔算齊，球隊正飽受中堅問題困擾，幾位可踢中路嘅守將如盧普、文尼、拉法盧比斯及阿柏達斯都正在養傷難落場，如今陣中就只剩丹尼爾戴亞斯呢位較為粗枝大葉嘅中堅，殘陣出戰仲要對住弗爆嘅皇馬，防線肯定大受考驗。


柏度李安冇得倒戈


除此之外，基達菲兩名新兵柏度李安及古爾沙同樣難落場，前者因借用條例不允許倒戈，後者亦因缺態所以今場未必披甲。基達菲陣容如不整，睇怕都好難爆冷製造驚喜，所以加輝繼續捧皇馬大勝，大細中位數3.5球照撐大盤。