保頓耆英頂唔住紅魔新星

猪拉多纳

10/09/2011
文： 阿占

英超開咧無耐，唔少球迷已經認定冠軍唔係曼聯就係曼城。不過阿占覺得曼城愈威，就愈逼到紅魔出真功夫！今晚曼聯作客保頓肯定搏，更何況湯卡華利、菲爾鍾斯呢啲新星有料又有Heart，保頓班「耆英」隨時畀人攻到氣咳，捧2倍「讓球客勝」夠晒穩陣！




（有線200及300、廣東體育周日凌晨0:30直播）




曼聯開季3戰全勝，贏完熱刺3球再炒阿仙奴8:2，真真正正係霸氣逼人！對今季以新星掛帥嘅曼聯嚟講，開個靚頭實在係好重要，睇住艾舒利楊格、韋碧克、湯卡華利、菲爾鍾斯同基斯史摩寧呢班人踢到曉飛，仲連隨入埋國家隊擔正，依家想勒住佢哋？睇怕都無乜可能！


里奧今仗有望復出


夏季轉會市場臨閂前，曼聯乜都無做過，小弟覺得費Sir真係深明用兵之道！事實上，紅魔本身嘅人腳已經好充足，難得係班兵家陣信心爆棚，如果再買人，除咗影響整體性，亦可能會畀班o靚仔以為費Sir覺得佢哋唔掂，家陣費爵爺按兵不動，擺明想班後生仔為佢賣命，高招！




講到陣容，隊長尼曼查維迪即使未好番，菲爾鍾斯同莊尼伊雲斯都夠料頂上，賽前仲傳里奧費迪南今仗可以復出，令紅魔兵源調配更靈活。係，前鋒韋碧克養傷，但後備嘅查維亞靴南迪斯有幾勁，唔使多講啦！咪忘記湯卡華利、朗尼同楊格都弗到震，曼聯想入波？易過借火！


保頓轉會窗執賣剩蔗


對家保頓喺轉會窗都幾多動作，包括引入尼高治、卡古達同保耶達咁，不過佢哋幾個只係勁旅預備組嘅成員，又點會即刻有正選吖！講到尾，保頓三線咪又係要靠老鬼支撐大局囉！鋒線由34歲嘅奇雲戴維斯孭飛，中場得32歲嘅馬田柏杜夫叫有啲卡士，防線靠36歲嘅積亞基連倫指揮？咪玩啦，呢班老將又冇質又冇氣，咪盞畀紅魔班新星玩殘囉！

有線球彩台主持阿占

電郵：soccer64@cabletv.com.hk&#8231HONE波熱線：1831 678

「超級星期六」開放時間：周六晚9:00至周日凌晨2:30

頂占筍盤：曼聯（讓球客勝）