布力般蝦兵蟹將難敵富咸

猪拉多纳

11/09/2011
文： 樂比堅尼

當印度財團上季入主布力般流浪嘅時候，好多人對呢隊波充滿憧憬，又話搵馬納當拿執教，又話斟魯爾、朗拿甸奴，點知全部都係得個吹字，結果轉會窗關閉前，只搵到耶高保呢類貨色嘅球員加盟，樂比仔認為布力般係今季嘅降班膽，今晚作客捧對家富咸！（有線200及300台周日晚11時直播）

其實當初拉奧同巴拉積入主布力般嘅時候，樂比仔已經唔係太睇好，畢竟印度人好識做生意，佢哋絕對唔會做蝕本生意，事實證明布力般近一年嘅所謂收購消息，都係雷聲大、雨點小，最終買入嘅都係蝦兵蟹將，對整體幫助唔大，前線靠羅拔斯、耶高保兩位年紀大、速度慢嘅球員衝鋒陷陣，實在難寄予厚望。


領隊堅恩唔夠料


不過，人腳差一樣有人腳差嘅打法，樂比仔咁睇淡布力般，並非因為佢哋質素差，而係佢哋欠缺一位好領隊，陣營士氣亦差，淨係睇迪奧夫同艾馬頓先後炮轟領隊堅恩，就知道球隊氣氛並不和諧，雖然好多人覺得迪奧夫係滋事分子，一向鍾意搞事，但樂比仔卻認為佢係口直心快嘅真漢子，喺佢口中先可以知道球隊鮮為人知嘅一面！


富咸季初表現麻麻，聯賽三戰僅一和二負，但輸波兩場都係作客，呢隊波一向靠主場搵食，所以今場喺卡雲小屋球場出戰，絕對係開齋最好時機，尤其係富咸領隊祖爾有感攻力不足，喺轉會窗關閉前羅致哥斯達黎加前鋒拜仁雷斯加盟，加埋森莫亞、丹普西及杜夫等攻擊球員，樂比仔對佢哋前線有信心，今場一於捧主Ｗ及大盤！