洪禮賢講馬：睡得好 要買趁早

猪拉多纳

　　第六場三班1000米。「精靈勇駿」前季初出跑得好，上季早期則跑到一塌胡塗，進度問題？傷患影響？唔使再回頭查證，知道佢唔係休出唔掂就夠。由於吳廐馬季初普遍工夫唔多，佢跳過2課、1課大閘，其實算係有準備。當然，開鑼日廐侶「多益善」賽前又係做過相若程序，結果一樣唔得，「精靈勇駿」會唔會又係放放吓斷，唔排除呢個可能性。但另一方面，今場佢排好位、對手大多唔擅長此程，而本身速度夠快，條件以佢最四正，如果交到上季尾喺三班1200米嘅能力值，有權放到。

　　第七場三班1650米。「睡得好」係今季苗廐首匹試大閘之馬，亦係少數廐內季初會去試大閘，有咁嘅安排，直線去諗意圖，想趁早操起，搏季初頭圍，始終呢匹馬評分並無優勢可言，78分係尷尬位，未至於動彈不得，卻幾難贏，好在季初階段會冇咁難搵食。

　　而查過此駒轉到此廐後，跑親A欄谷草1650米，好少冇P（5場贏3W），加上，近季苗廐季初跑得此程嘅馬，向來表現穩定，所以，就算此駒131磅唔易贏，做膽應可勝任。

馬會賽馬節目主持　洪禮賢