車仔炒利華簡單任務

猪拉多纳

13/09/2011
文： 樂比堅尼

富豪收購頂級歐洲球會，最終目的當然係名成利就捧走歐聯獎盃，八年前阿布拉莫域收購車路士後不停泵水，前後用過六位領隊都未能如願。保亞斯「上車」，都知佢最重要任務就係歐聯錦標！車仔今晚E組主場對住利華古遜贏唔到兩球開唔到讓球勝，點同老細交代？


（有線62及202台周三凌晨2時45分直播）


車仔年初從利記買下「五千萬先生」費蘭度托利斯，中伏味道甚濃，到底身價咁貴係咪一定有得踢歐聯？保亞斯就表明話之你鑲金，總之狀態唔好嘅就冇得踢，現時史杜列治有潛質，佢同安歷卡、桑馬達組成嘅鐵三角都幾嚇得人，「王子」可以放心休息。


依家保亞斯再簽埋魯爾梅利斯，佢喺中場周時有神來之筆，車仔整體陣容比上季更加強化。保亞斯以往帶領波圖時，最鍾意同對手鬥攻，加埋佢有歐洲賽領軍經驗，車仔今晚有主場之利必先痛宰利華。

三號門將未見過大場面

利華古遜於歐洲賽事亦都留低唔少腳毛，但始終闊別歐聯咁多年，領隊杜特亦冇乜大賽經驗，令利華贏面大減。今晚其中一個焦點係倒戈嘅波歷克，不過佢都過晒氣，都唔會畀到乜嘢威脅車仔。由於首、次席門將有傷，利華將繼續用小將賓特尼奴把關，我之前雖然讚過佢唔錯，但踢歐聯對住高幾班嘅對手又係另一回事。利華後防唔掂，要出線次圈好難，我相信最終都係由車仔同華倫一齊晉級。


Wendy 推介：車路士（讓球主勝）