洪禮賢講馬：仔仔女女泥閘搶鏡

猪拉多纳

　　第九場三班1200米泥地。「仔仔女女」上親名都喺四班，三班未證明過，但由於之前跑三班賽係未轉好嗰段日子，夠唔夠斤兩？今次未必又捱打，實在113磅、路合及1檔，已經有唔錯條件。

　　講到準備流程，「仔仔女女」做好晒先嚟跑今場，有晒誠意。8月中已經開始出圈快跳，兩周後更拍完又拍。而喺未試閘之前嗰課拍跳，喺埋便輕易以快時間跳贏廐侶，姿態爽勁。隔日安排試大閘，騎者喺末段畀隻馬自己喺中檔衝，喺冇畀壓力下，隻馬衝得起勁，主動性及貫注力皆好。睇嚟進度經一大輪操練，已經撚起，如果泥地狀況唔係冇得追，直路應該係佢天下！

　　第十場三班1200米草地。「點石成金」上季尾同程後追入Q，如果直路上唔係「支支咗咗」，頭馬「禮尚往來」係咪可保持4場不敗，的確好有疑問。雖然睇佢之前大閘仲係有啲促，但見周四最後試跑，佢喺面前走過，唔覺搶口或火氣過猛，暑後進度持續向好。只要14檔唔係令早段擺位特別衰，以佢可力追「禮尚往來」嘅級數，呢場冇咩馬夠揮。

馬會賽馬節目主持　洪禮賢