洪禮賢講馬：大衛精神健康藍莓愛睦善勝利就手 點石成金精彩生輝寶成智星勁信心

猪拉多纳

　　睇過隔晚有唔少飛係啲咩馬，有部分係因人或往績而熱起上嚟，未必與馬匹機會有關連，某程度上，今日有啲場次，要好小心諗清楚，熱門捧唔捧得過，如果唔係好易上當。與此同時，是日的確有不少具分頭之馬值博，趁亂局冷門唔怕拖一票。

重心場次　第10場　第三班（80-60分）1200米草地

　　「點石成金」早前大閘直路拖得好實，略嫌未夠收斂，但見之後試跑，姿態放鬆，的確係好現象，證明暑後進度比上季理想；同程曾力迫「禮尚往來」，三班幾超，如14檔唔係亂咗籠，可出頭。

　　「精彩生輝」大閘表現有氣勢，降回三班又筍，轉倉首仗或可即有好成績。「爪皇盛水」試閘表現好曳，但之前廐侶「金堡龍華」又係試閘差而出賽好，呢點要留意，計實力喺三班同程，就算重磅仍是一線馬。

　　「洪福齊來」嫌未夠銳。「揚威寶」未證明太多，不過，進度幾好，跑完今場如加程，已可郁手，留意走勢。「寶成智星」上賽初出沿路三叠，去到直路中段仍有兩腳，開氣後再跑此程而檔好，不難提升名次。「勁信心」賽前準備與上季初一出即勝差唔多，如呢場冇馬走，或可揩油水。

第1場　第五班（40-15分）1600米草地

　　「雪蹄靈驥」上季四五班各取1W，級數唔係一般同級馬可比，除非未熱身莫氣，如果唔係，以準備手法睇，今場係落點。「雄心馬主」此程係極限，好在已有熱身，加埋1檔，或可慳慳埋埋扳到。

　　「大衛金剛」成日唔夠鬥，好在步步靠檻在此班殺食。「威陽」上季尾見跑得番，現評20分，根本與真正能力值折讓太大，肯去省課大閘先出賽，有心搏今場。「朝東之星」及「金滿貫」TF腳。

第2場　第四班（60-40分）1200米草地

　　「銀飛龍」上季初出早段屢次外閃，而末段唔多願郁（騎師），一樣可貼住「駿方」返嚟得殿軍，四班實超。之前嘉年華閘冇頭罩，走起嚟係「擺」得較多，出賽嘗試加配件或者係好事。「一路奇兵」遲復課，或拖慢狀態進程，計班次則有利。

　　「心中有勁」喺四班底分，着數得好緊要，唔係亂放或被燒，唔難放入三甲。「定做」情緒係愈來愈定，外檔未必影響大。「共同目標」三班成日近，降班首仗寧跑短，心態唔知點，不過，早前試短途泥閘，最後100米曾刻意試過幾步，隻馬唔係冇反應，睇嚟已預演了！

第3場　第四班（60-40分）1000米草地

　　「風雲」最後試跑輕易跳贏廐侶，但冇過「行」，而喺嘉年華閘抽實都喺前列返嚟，暑後進度持續。「危險大軍」大閘拉士唔夠主動，加罩希望令佢更專心。

　　「東方駿馬」3月尾同程上名時，可夾在一大堆三四班頭馬之中，屬身份象徵，當然，今場比嗰場多負10磅，或稍有影響。「太陽好好」唔似正宗短途馬，不過，以早課角度，心智及跑姿係有轉變。「麗晶之星」和「好歌」唔叻，卻跑線好，尤其熱過身嘅前駒。　

第4場　第四班（60-40分）1200米泥地

　　「八發八中」最近谷閘狂追（騎者有迫過），末段幾爆得，反應堅得。休出揀此程，部署與上季一樣，又係想搏首戰。

　　「都靈一號」及「好通勝」同試大閘，前駒騎者有「質」，畀到唔錯後勁，後駒則放順贏，對兩駒印象俱好。「宇宙良駒」負輕磅跑強項，唔夠態亦會拖一注。「金榜題名」腳法應合泥地，跑法也夾到，可敲。

第5場　第四班（60-40分）1400米草地

　　「薄荷糖」及「多利皇」，有班但進度未夠妥當，過熱反而認為唔值博。

　　「信賴」初出喺彎前已被擯出最外便，過早發力仍有第四，演出比預期好。因應今場4檔，只要掌握到形勢，成績料比上場好。「龍勝」贏同程一役全程蝕，該場二三名又唔係差，跑得番隨時掃晒。「音樂家」靠檻，冇竄勁，又會側頭，如嘗試擺頭走，可能更好發揮。

第6場　第三班（80-60分）1600米草地

　　「大衛精神」最後試跑嗰朝係早段因閃電影響情緒，之後試得輕爽，睇走勢已具幾好水準。以佢上季初可80分入Q，目前分數有賺。「健康藍莓」對上兩季初出分別喺1400及1600米獲WQ，睇今仗整套操練，仍有相同心意。

　　「勝利就手」擔心太被動，追唔切。「愛睦善」跑法經常會賺，何況，今場好位而未必步速快。

第7場　第一班（115-90分）1400米草地

　　「人人興旺」上季人馬唔多夾，首次合作仍上名，今季騎者硬淨咗，發揮會有幫助；計馬太準，路程又啱，膽材。「國寶」及「勇敢小子」，1匹有卡士，另1匹演出穩，拖晒。

　　「愛跑得」初出冇W有P，休出競爭力勁。只係介意呢個禮拜冇跳過。「富高勝」歷年來第2仗實贏，數據夠堅。「歡呼星」冇咗眼罩會唔會打回原形？唔係冇可能。

第8場　第二班（100-80分）1200米草地

　　「明燈」上場如果最後幾十米再肉緊啲，唔排除有前四名。熱身後換人及轉程，兩樣轉變俱有利，有埋2檔仲好跑，有贏面。「開心歡笑」多年來初出唔贏都有P（4個季度），呢項「傳統」要尊重。

　　「旺當家」今季情緒轉趨淡定，預期能力可會進一步。「福勝滿載」二班往績叻，博流鼻血後影響唔大，有權搗亂。

第9場　第三班（80-60分）1200米泥地

　　「仔仔女女」泥閘自動自覺湧上，過程吸引，唔係騎練太耐冇喺泥地一齊贏過，信心會更大。「天賜福星」做好晒，對準強項，唔使諗戰意問題。

　　「明達」11檔，好視乎韋達出閘後心態，跑得好唔好，早段係關鍵位。「聖迪達」泥地好手，初出又好，正路腳。「龍城動力」試泥閘長期有前三名，本身亦有級數，轉場未必唔好。「肥仔糖」備戰過程完善，如臨場情緒冇突變，有力爭前列。

馬會賽馬節目主持　洪禮賢