熱刺紅軍「和」氣生財

猪拉多纳

18/09/2011
文： Yennie

今晚英超連場激戰，除咗車曼大戰，仲有熱刺對利物浦嘅準Big4激鬥！兩班波開季成績唔多理想，熱刺只係靠上輪作客贏狼隊開齋，利物浦就喺轉會窗關閉前賣走主將魯爾梅利斯，搞到創造力大減，上仗即刻輸畀史篤城，既然兩邊都唔多掂，3.2倍和就最抵博。




（有線200及300周日晚8:30直播）




熱刺喺英超頭3輪只係攞到3分，首兩周夾埋更喪吞曼市雙雄8蛋！講真，班球迷又點會收貨吖！好彩，中場重心莫迪歷之前嘅離隊風波已經平息，佢仲話已決定留守白鹿徑，喺轉會窗閂埋前，熱刺又得到前皇馬射手艾迪巴約以借用形式加盟，加埋韋斯咸嘅英格蘭國腳柏加，呢班波嘅實力真係拍得住利物浦o架。


熱刺雲達華治未傷愈


可能有人話佢哋周中歐霸盃作客去到希臘鬥PAOK，體能點都會輸蝕，但查實夏利叔喺嗰場波，只係派咗副選出戰，大部份主力好似門將費度、前鋒迪科爾等都冇份落場，所以體力唔成問題，唯一憂慮，只係核心雲達華治可能趕唔切傷愈，呢點無疑影響咗熱刺嘅入球能力。


利記賣走梅利斯超錯


係，計人腳名氣，紅軍係高半線，弊在古積特狀態差過上季，安祖卡路爾又好似同班隊友唔多夾咁，鋒力真係麻麻哋o架咋。何況利物浦中場已經冇咗魯爾梅利斯，創造同截擊力大不如前，防線嘅老將加歷查又頻頻犯錯，想紅軍憑質素贏熱刺？真係有啲難度。Yennie覺得兩軍狀態同實力都係差唔多，今場波好大機會握手言和。




半隻腳踩咗入o靚模界，但最後決定以學業為重。如今畢業在即捲土重來，希望大家支持。外國波、本地波都係佢「飛佛」。

微博傳情

今年中秋我同好友去咗環球貿易廣場100樓嘅觀景台賞月，360度欣賞香港嘅夜景，一邊賞月一邊食月餅，應吓節嘛！每年送禮都係買月餅，今年搞搞新意思，第一次自製迷你奶黃酥皮月餅！雖然搞咗成個晏晝，但焗完出嚟見到個製成品（下圖），就覺得係值得嘅！另外，嚟緊星期五晚嘅港甲南華對日之泉JC晨曦，我終於可以抽到時間入場觀賽喇，到時球場見！

Yennie靚盤：熱刺（和）

有赢不输