國米「大」唔起路華拿

猪拉多纳

20/09/2011
文： 朱楓

置諸死地就一定後生？未必！近況低沉嘅國際米蘭，傳聞今晚意甲快車作客贏唔到升班球隊路華拿，教練加斯柏連尼就會人頭落地，但據講呢位教練其實早就失去控制權，中場史奈達更傳受傷可能缺陣，對住有一定入波能力嘅路華拿，要贏唔容易，朱楓寧博1.9倍入球大！（now633台周三凌晨2:45直播）




被喻為爭標大熱嘅國米，估唔到新季表現會咁令人失望，繼揭幕戰不敵巴勒莫、歐聯主場爆冷不敵特拉布宗後，上場主場對住羅馬又被對手逼和0:0，錄得3場不勝。


3人防線速度慢甩漏多


由於表現實在太曳，《羅馬體育報》指國米今晚作客路華拿若再有差池，教練加斯柏連尼恐怕人頭不保，爭勝戰意睇落好鮮明，弊在意大利Mediaset電視台《深度足球》嘅主持近日爆料，話國米對羅馬一仗，教練加斯柏連尼多次喺比賽入面向科蘭同莫路沙拉迪呢對箭頭下指令，點知兩個都冇睬佢，似乎已失去控制權，賽前《共和報》仲爆出史奈達上場對羅馬整傷隻腳，今場可能缺陣，再加上防線繼續打三個後衞，可以預期國米今場仍然會係有前冇後格。


路華拿森本貴幸博表現


本被喻為今季降班大熱嘅路華拿，暫時表現反而令人有驚喜，繼首仗作客打和基爾禾2:2後，上場作客亦僅負卡利亞里1:2，連續2場作客都入波，火力比國米似乎仲靠得住，今晚首度回師主場比賽，肯定加多兩錢肉緊，特別係日本前鋒森本貴幸，上場加盟後首度擔正即有「士哥」，為保正選今場肯定唔會放過國米。事實上，呢位日本前鋒一向以快見稱，對住國米條穿窿三人防線，肯定大把表演機會，隨時「間接殺死」加斯柏連尼都未定！


横掃千軍


 路華拿場場有波入




‧近3仗正式比賽均有入波，共有7球進帳。

‧上季意乙主場獲11勝9和1負。

藍黑軍後防唔穩陣

‧近8場1勝3和4負，對上5場勁失8球。

‧前鋒柏仙尼今季仍未開齋。