馬主論戰

猪拉多纳

歐洲動力後勁強

　　文家良剛戰憑「富高勝」同「駔驍駿駒」起孖兼捧盃，睇嚟有心響季初搶攻，今晚一於吼實佢啲馬。

　　鍾意尾場「歐洲動力」，上季唔經唔覺贏咗三場，實力唔使懷疑，後上馬排外檔影響唔大，以佢嘅後勁，隨時可憑一條直路掃晒。

　　另外推介第三場「家樂飛」，我睇得呢隻馬幾高，跑一班賽亦唔會有任何阻力，吼準盃賽場合再上陣，兼且用到柏寶操刀，已經表明晒心迹，要捧。

張敬山

駿盈先拔頭籌

　　跑咗三次賽事，伍碧權已經贏咗兩W，睇嚟呢個馬房今季唔再慢熱。推介頭場「駿盈」，上季尾曾打叠兩場入Q，證明評分有啲着數，今季已跑過一場熱身開氣，今次增程跑一哩有權先拔頭籌。

　　另外要留意第二場「精算拍檔」，上季響安廐已有唔錯表現，今季轉投伍廐之後，工夫由頭做起，今場對手唔算強，我睇好呢隻馬可以幫馬房省招牌。

任達華

高友勁必謀交代

　　梁家俊剛戰中三元，搏殺手風大順，今晚一於吼實佢手馬。推介第五場「高友勁」，上季試過同「神州八號」串Q，今次落到四班一定有着數，來港後尚未交代之馬，必定搏盡。

　　另外鍾意第七場「好旺財」，上季頭五場取得三冠兩亞，證明季初係搶攻最佳時間，若然順利放出操控步速，隨時可以畀佢直領到終點。

寇鴻萍、梁廷鏘