紅魔大晒 5箭亂射史篤城

猪拉多纳

24/09/2011
文： 樂比堅尼

曼聯周中聯賽盃大勝列斯聯三比○，除保持今季本土賽事全勝兼全開大盤，更打起埋梅開二度嘅奧雲仔，加上查維亞靴南迪斯及韋碧克傷愈，聯同今季已入九球嘅朗尼及上季英超神射手貝碧托夫，曼聯射手多到暈，今仗實行五箭亂發射死史篤城，樂比仔捧大盤。（有線200及300台周日凌晨零時30分直播）


奧雲起孖成手靚牌


曼聯今季聯賽五戰五勝，射入二十一球，當中朗尼最弗射入九球，而韋碧克、查維亞靴南迪斯亦甚勇，難怪費格遜話依家有五張好牌喺手，都唔知派邊個落場好，但樂比仔相信無論出邊個都好，曼聯勝算都相當高，既然客W得1.48倍唔太吸引，史篤城又有入球能力，倒不如今場捧1.75倍嘅大盤好過！




曼聯有幾勁同點解咁勁，相信唔使樂比仔多解釋，曼聯嘅強勁入球能力，建基於佢哋行軍速度極為迅速，而且前鋒把握力極強，連防守力強嘅車仔面對曼聯都要失三球，相信史篤城亦好難頂得住。


史篤城攰到爆炸


何況史篤城要兼顧歐霸，近期賽程相當密，上周聯賽慘吞新特蘭四蛋，球員相當疲倦，周中英聯盃雖然收起幾名主力，但踢足百二分鐘，最終要靠互射十二碼分勝負，進一步削弱咗球隊嘅體力，只要曼聯盡快打破缺口，史篤城冇得死守，好快就會有第二球出現，兩軍上季兩次交手都開大，睇怕今場都唔會例外！