今日九駒 陣容鼎盛 葉廐馬海衝鋒陷陣

猪拉多纳

　　正如周星馳喺《食神》話齋：「咁易畀你估到咩！」呢個世界，又真係好多嘢估唔到，係驚？係喜？件事未發生，有時唔知會開邊便。就如一睇練馬師榜，4個馬房未開齋，薛達志、胡森呢兩個，出馬期期唔係多，後者4期只出5駒，擺明慢慢嚟，所以，冇W到手，有乜咁意外。而吳廐取向亦有同樣意思，未有馬贏，亦唔會大驚小怪。

　　然而，葉廐至今出馬31匹，只得4場位置，未免令人失望，亦係幾估唔到嘅結果。呢個馬房唔係冇試過大批大批馬咁報名，上周日先出夠10駒，但成績止於一席亞軍。睇佢今期陣容，又係出馬多（9駒），如「歡樂寶寶」、「御鋒」及「太陽海岸」，唔係有近績，就係有往績撐腰，希望此廐振作。

　　而睇過「歡樂寶寶」上賽走勢，喺1400米撻唔起，只得位置，照理加程唔應該會撞板。「御鋒」唔使講咁多，直路賽好手，又曾經贏過同場主要對手「勁闖駒」，前速咁快，或可放到。最後一提，「太陽海岸」有實力早課又有做妥準備，大有配合今日攻勢而來之意。

Jack