小保加 驚死好搏命

猪拉多纳

25/09/2011
文： 笛子波童

阿根廷聯賽分春、秋兩季，由於不設總決賽，所以喺普羅球迷心目中認受性不高，始終聯賽講求穩定性，球季時間太短，實難反映一支球隊嘅真正實力，所以過去十季阿甲從未有一支球隊可以成功衞冕，未計周日凌晨賽事，上季冠軍沙士菲目前僅排十三位，睇怕好難打破呢個宿命。

唔知係咪受到死敵河床上季護級失敗刺激，另一支傳統班霸小保加今季大打爭氣波，踢咗八輪聯賽依然保持不敗，如今於榜首有四分領先優勢，明早作客仲未開齋嘅小阿根廷人，1.95倍客W值得支持。（周一清晨5時10分開賽）


競賽會受讓值博


另一支未敗之師、最有機會挑戰小保加嘅競賽會亦會作客出擊鬥聖羅倫素，競賽會中場祖雲尼摩蘭奴係阿甲最出色嘅10號仔之一，其同胞杜費路古迪利斯亦係極具級數嘅前鋒殺手，這個組合確令唔少對手聞風喪膽，競賽會難得受讓值得捧場。