拉素齊心捉傻豹

猪拉多纳

25/09/2011
文： Katie

唔知係咪Katie轉咗口味呢？呢排小妹突然情傾熟男，好似我偶像佐治古尼咁吖，50歲人都一樣咁弗咁有男人味，如果個天肯畀件咁高級數嘅型男我就好咯！查實意甲戰場一樣大把型佬，拉素嘅高路斯正正係我杯茶，呢支首都球隊今晚主場迎戰巴勒莫，我梗要撐偶像捧1.67倍主勝啦！（now633台周日晚9:00直播）

隨住莫路沙拉迪過檔國米，拉素今夏一口氣簽入高路斯同施斯，佢兩個都過咗3張，都唔知幾多人睇死呢對「過氣鋒將」幫唔到拉素，但又有邊個估到33歲嘅高路斯仲咁弗吖，新季3戰已經省入兩粒，啲頭槌都仲係咁堅，真係唔到你唔服。


球員Fans力撐教練


早排因為同Fans發生衝突決定劈炮嘅教練列查，最後回心轉意收番封辭職信，卒之拉素上仗就反勝切塞納重返勝軌，隊長洛基亦呼籲擁躉要全力支持列查，有球迷組織更表示唔會再同列查搞對抗，收起晒所有鬧佢老人家嘅橫額，球迷、球員同教練同一陣線，士氣梗係好啦！


巴勒莫開季3戰失6球


Katie上網摷過料，知道拉素後衞古斯比比亞華、史堤芬拉度同中場莫利仲養緊傷，但對家巴勒莫亦唔好得幾多，後衞錫圖同加納悍將艾古亞都有傷在身，要知道呢隻「傻豹」開季3戰失咗6球，防線唔穩加上缺少兩位中後場球員，都咪話唔大劑。仲有喎，拉素近4次喺奧林匹高恭候巴勒莫錄得3勝1和，往績贏你，戰意又旺盛，今晚要攞3分唔難吖。


微博傳情


呢排天氣涼番，大家記住着多件衫喇！Katie就係因為懶大隻着背心瞓覺，卒之就咁中咗招，病咗足足成個禮拜呀，陰功！

好彩，經過Daddy日日煲藥畀我飲之後，我個病已經好番晒啦，除咗要多謝爸爸，當然仲有Send過訊息問候我嘅朋友啦，哈，見我又化行妝，就知我已經完全「復活」啦，嘻嘻！^^

Katie心水：拉素（勝）

外國長大，半個鬼妹仔，自細因爸爸成日帶朋友返屋企睇波而愛上足球，鍾意睇靚仔但唔會盲目追捧，最緊要係好波。