班菲特搶分保主帥

猪拉多纳

26/09/2011


仲有一個禮拜左右，班菲特就會舉行會長選舉，如果現任波士樸迪爾下台，教練拿禾比好大機會執包袱，為咗保住主帥，今日佢哋作客聖達菲聯實搏，受讓平半不妨要1.8倍下盤。（開賽時間：周二凌晨4:00）




班菲特今季戰績唔理想，早個幾星期前先至終止6連敗，一口氣攞到1勝1和，叫做穩定咗落嚟。但係依家佢哋面對一個大問題，就係會長選舉，在野派候選人史賓奴沙走勢唔曳，一旦佢踢走咗樸迪爾，教練拿禾比好大機會要行埋一邊，呢位主帥亦都公開承認：「假如樸迪爾連任，我會繼續追隨，若果係在野派登台，我都會坐低同佢哋傾傾，萬一佢哋唔想我响度，我咪走人囉。」


聖達菲聯傷兵多


基於呢個原因，拿禾比下令今仗要擸晒3分，問題係班菲特目前傷兵唔少，前鋒艾祖卡奴左足踝傷咗，可能要用拿素柏法古度費雷拉攻堅；後衞莫路杜斯山度士膊頭受傷，今日入院開刀，要搵右膝剛啱好番嘅古斯達禾里度做替工，所以贏聖達菲聯未必咁易，打和把握相對大啲。




好彩3戰不敗嘅聖達菲聯，傷病問題仲嚴重，前鋒馬迪亞斯基洛加、中場般拿、後衞連素韋拉都唔多掂，多數要派蘇比根同坐完波監嘅巴拉里斯頂上，即使有主場之利都冇乜優勢，都係博班菲特下盤好過。